المسكرا شي مهم جدا في المكياج وبالنسبة ليا هي احلى واهم شي
يعني عادي نستغنى على الفاونديشن والبلشر والروج بس الماسكرا لااااا.
جربت اكثر من نوع واكثر من ماركة منها الغالي ومنها الرخيص فاحنوريكم الماسكرات الي جربتهم ورأيي فيهم.

ملاحظة : ممكن الماسكرا الي تعجبني ماتمشيش مع غيري وممكن الي ماتعجبنيش غيري يحبها :)

نبدو مع اول وحدة وهي من كلينيك ، الماسكرا هذي فالبداية عطوني منها سامبل جربتها وعجبتني! وقعدت ما نستعملش الا هي وبعد ما كملت شريت منها الحجم الاصلي ، ميزتها سوادها داااكن ، ماتتكتلش عالرمش، تكثف الرموش وتبين انهم طبيعيات ،، لكن عيوبها ان فالمسح متعبة شوي .

ثاني وحدة هذي الحب <3 من مايبيلين ، تنفع لكل يوم وتنفع للمناسبات والافراح ،، سوادها داااكن ، تكثف الرموش، تطولهم ، وفرشتها جاية مقوسة يعني تقوس الرموش برضو، والاهم انها ماتتكتلش عالرمشة وخفيفة فالمسح ،، وسعرها في متناول الجميع



الماسكرا رقم 3 وهي من قودجي في اول كوليكشن للميك اب يطلعوه ،، الصراحة السبب الاول الي خلاني نشريها هو شكلها من برا :p ،لكن الماسكرا بصفة عامة حلوة وتنفع لكل يوم خفيفة عالرمش ،، وتبان طبيعية جدااا بس نحسها خفيفة مش للمناسبات ،، والصراحة من اول ما جربت المايبيلين قل استعمالي للقودجي ،، عيوبها ان سعرها شوي غالي وبرضو بسرعة تنشف .


رابع مسكرتين من ارماني ،، من اول المسكرات الي استعملتهم ،، حلوات حلوات حلوات ،، للاستعمال اليومي والمناسبات وسعرهم حتى لو غالي شوي مش خسارة فيهم،، سوادهم داكن ،، خفيفات عالرمشة ، يمتسحو بسرعة ، ومايتكتلوش وشكلهم طبيعي ،، ويفرقن الرموش عن بعضهم ويكثفنهم



الي لونها اسود حسيتها تكثف اكثر من الي لونها فضي لكن الاثنين حلوين.

نجو لخامس ماسكرا من الماسكرات الي حبييييييتهم وننصح اي حد بيهم هي ماسكرة رولر لاش من بينفت ،، الماكسرا هذي جتني هدية من محل سيفورا لان لما تشري منهم واجد وتوصلي عدد نقاط معين كل مرة يعطوك هدية والمرة هذي كانت ماسكرة بينفت ،، كلمة حلوة عليها شوي ،، خفيفة عالرمش تطولهم بشكل رهيب وتبينهم طبيعيات ،،، لونها اسود ،، وحتى لو درتي منها كم طبقة مش حتتكتل ،، اول ما نكمل السامبل بإذن الله ناوية نشري منها الحجم الاصلي


نجو توا للماسكرات الي ماحبيتهمش ،، نبدا بماسكرا من فلورمار وهي ماركة تركية ،، الماسكرا هذي منعرفش ليش وكيف شريتها ،، هي الالكترونية ،، عيوبها ان ماديرش اي شي يعني لا كثافة ولا طول بس تزيد اللون الاسود فقط لا غير ،، مش حنشريها مرة ثانية ولا ننصح اي حد بيها .



الماسكرا الثانية الي ماحبيتهش نهائياً من سيفورا ،، صح سوادها حلووو بكل لكن تلبز العين ولو دايرة ميك اب العين حتخربه لك واستعمالها صعب شوي وغير عملية ،، غير ان مش  بالساهل تمتسح ، واعتقد ان سحبوها من السوق لان ناس واجد ذموها

هذي كانت تجربتي مع الماسكرات :) ان شاء الله نكون فدتكم 
لو في وحدة من الماسكرات الي عجبوني ما عجبوكش ياريت تقوليلي السبب ولو وحدة من الماسكرات الي انا مش حابتهم انت عاجبتك قوليلي كيف تستعملي فيهم وشن الشي الي عاجبك في الماسكرا هذي 
وبرضو لو في ماسكرا انت حابتها وتنصحيني بيها ياريت تكتبيلي اسمها ومن اي ماركة <3