مزيل المكياج من لانكُم Lancome makeup remover

5:55 PM Meciritty 0 تعليقات

السلام عليكم ورحمة الله وبركاته،،

مسح الميك اب شي ضروري ،، لو تبي بشرتك تكون حلوة ونظيفة ماترقديش وانت مش ماسحة وجهك كويس من الميك اب ونفس الشي للعين ،،   
وتقريبا كل الماركات مدايرين makeup remover للعين وللوجه او للاثنين مع بعض 
المرة هذي حنتكلم على ماركة لانكوم Lancome 

شريت اول شي مزيل الميك اب بتاع العيون ،، عجبني بكككككل ،، اولا خفيف عالعين ومايطيحش الرموش ،، ثاني شي عبارة عن زي الميا يعني مافيش زيد ويدهن حوالين العين 
وريحته حلوة كأنها مية ورد

وينظف العين كويس بكل من الايشدو والماسكرا والكحل ،، ونستعمل فيه حتى للحواجب واحيانا للوجه كامل ويعطي فيا نفس النتيجة 
هل حنشريه مرة ثانية؟ 
عادة نحب نجرب منتجات جديدة بس اكيد لو مالقيتش بديل له حنرجعله اكيد

خذيت نوع ثاني من نفس الماركة شكره ليا اكثر من شخص وهو عبارة عن كريم مزيل للميك اب للعين والوجه 

جربته اول مرة ماعجبنيش واجد عطيته اكثر من فرصة لكن ماعجبنيش نهائيا
اولا لما مسحت بيه عيني حرقني وماقدرتش نكمل بيه وثاني شي ماينضفش كوويس بكككل 
نحتاج نمسح مرة واثنين وثلاثة وبرضو يكون في مزال ميك اب عالعين وعالوجه 

ميزة وحدة عنده ان يرطب الوجه شوي 
وللاسف خذيت الحجم الكبير ومعش عرفت كيف نكمله 
فا حاليا نستعمله لما مانكونش حاطة ميك اب ثقيل وبعدها نغسل وجهي بكلارسونك عشان تنظيف عميق 

ممكن نكون مستعملته غلط او ما عجبنيش ويعجب حد ثاني او يمشي معاه :)