علاج الكاڤيار من كرستس للشعر

السلام عليكم ورحمة الله وبركاته،،


الفترة الاخيرة انشهر الكاڤيار لعلاج الشعر💆🏻 واكثر من شركة دارت منه ماسكات وكريمات واغلب الصالونات حاليا يستعملو فيه لعلاج الشعر.

من فترة تكلمت على السناب شات 👻 والانستجرام على علاج الكاڤيار للشعر الي نستعمل فيه وشرحت على السناب طريقة استعماله ، واخيرا جت الفرصة ان نكتب عليه تدوينة.
علاج الكاڤيار من كرِستس غير شعري  للاحسن طبعا بعد الڤيتامين الي خذيته و وغير شعري 180 درجة للافضل وكتبت عليه تدوينة تقدرو تشوفوها من هنا .

البوكس الكامل تبع علاج الكاڤيار من كرستس فيه 15 علبة صغيرة من الكاڤيار

 سعره 1200 درهم اماراتي بينما لما تديري جلسة وحدة في الصالون يعني علبة صغيرة وحدة تكلفك اقل شي 500 درهم اماراتي يعني فرق كبييييير في السعر فالافضل تاخدي البوكس كامل.
انا جربت اول جلسة عند الصالون وشفت طريقة استعماله والنتيجة كانت حلووووة فا توكلت على الله وقررت ان ناخد البوكس كامل.
اول شي ريحته حلوووة وتقعد في الشعر لين ما تغسليه ثاني ،، وثاني شي شعري قعدت فيه لمعة حلووة وترطب وقعد ناااعم بس مش مفرود يعني فيه كثافة غير ان لاحظت ان التقصف خف واجد ،، واكثر من حد لما شاف شعري يحساب ان مدايرتله استشوار وهو طبيعي .

استعماله من مرة لمرتين في الاسبوع بعد ما تغسلي بالشامبو على حسب طول وكثافة شعرك تحتاجي علبة او اثنين من الكاڤيار
تفتحيها وبعدين تحطي الشي هذا منعرفش شن اسمه🙊 تحطيه فوق علبه الكاڤيار وتضغطي عليه عشان يطلع السيروم الي فالكاڤيار

بعدها تحطي من الكريمة الي فالبوكس الكبير وطبعا الكمية برضو على حسب طول وكثافة الشعر 
وتخلطيهم مع بعض كويس بالعصايا الي هما حاطينها فالبوكس 

وتحطيها على شعرك كله وتبدي من تحت وبعدين تركبي فوق وحاولي ان تبعدي على فروة الشعر عشان ماتقعدش دهنية
وبعدها لفي عليه قزير او قصدير ومنشف ساخن وخليه اقل شي 10 دقايق لنص ساعة وبعدها اغسليه بس بالميا
وحتشوفي الفرق من اول استعمال
ننصح بيه وبقوة لان بجد غير شعري وااااجد ❣️

Snapchat: Meciritty
Instagram: Mecirittyblog