السلام عليكم ورحمة الله وبركاته،،
 اكيد اكثر من حد عاجبينه منتجات واجدة في الانترنت لكن مش قادر يشريها عشان موضوع التوصيل او ان هذي المواقع الي فيها المنتجات ماعندهش توصيل دولي
الحل مع موقع MyUS.com












 الموقع فكرته ان يعطيك عنوان ورقم تليفون في امريكا خاص بيك ولما تطلب الغرض الي تبيه من الانترنت تحطلهم العنوان الي عطوه لك الموقع ويوصلهم وهما بعدين يبعتوه للدولة الي انت متواجد فيها والعنوان الي عطيته لهم.
ليا سنة تقريبا مشتركة معاهم شغلهم مرتب وماعمره وصلني شي مكسر او مخترب وديما التوصيل في الوقت غير ان طريقة الاشتراك ساهلة وكل شي واضح عندهم ولو احتجت شي عندهم live chat تسأل ويردو عليك في غضون دقايق ،،والخبر الحلو ان راسلتهم قالولي ان يوصلو لليبيا .




 عندهم 3 انواع من الاشتراكات ،،





 الاول اشتراك تدفع 10$ رسوم الاشتراك ومافيش رسوم شهرية لكن الشحن عن طريق الاشتراك هذا غالي شوي ،غير هكي ماعندهمش تخزين للشحنة يعني اول ما يوصل الطلب بتاعك يبعتوه لك على طول ، وسعر الشحن يكون عن طريق وزن الشحنة

ثاني اشتراك بالنسبة ليا نشوفه افضلهم وهذا نوع اشتراكي
الي هو تدفع 20$ رسوم اشتراك وكل شهر 7$ يخصموهم من بطاقة الڤيزا الي سجلت بيها 
سعر الشحن في الاشتراك هذا ارخص من نوع الاشتراك الاول غير هكي عندهم تخزين الشحنات وتقدر تتحكم في شحن طلبياتك يا اما شحن يومي او اسبوعي او شهري او عند الطلب 




ثالث نوع تدفع 35$ رسوم اشتراك و25$ كل شهر ،، اسعار الشحن نفس اسعار شحن الاشتراك الي قبله الفرق الوحيد ان النوع هذا يستقبلو مجلات واوراق بريد ،، بالنسبة ليا مانشوفش له لزمة الا لو كنت شخص عندك اوراق مهمة من امريكا وتبي تستقبلها لليبيا او الدولة الي انت فيها.

طريقة الاشتراك سهلة بكل 
اول شي تدخل على الموقع من هنا
بعدين تختار sign up نفس ما موضع في الصورة



 تعبي البيانات 



بعدين تحط عنوانك الي تبي تستلم الشحنات فيه 




وبعدها تحط معلومات بطاقة الشراء او الڤيزا 



وتختار نوع الاشتراك وبس :) .
هكي خلاص تعتبر سجلت وحيوصلك على ايميلك العنوان والرقم الهاتف في امريكا وتقدر تشري اي شي يعجبك من الانترنت❤