كونسيلارات جربتهم

2:48 AM Meciritty 2 تعليقات

السلام عليكم ورحمة الله وبركاته
الكونسيلر من اهم الاشياء في الميك اب ، تقدري تستغني على الفانوديشن ( كريم الاساس) لكن صعب تستغني على الكونسيلر .
الكونسيلر هو خافي العيوب او خافي الهالات ،، ينحط تحت العين عشان يخفي الهالات السوداء.
بالنسبة ليا هو ثاني احلى شي مانستغنش عنه بعد الماسكرا، جربت عدة ماركات الرخيص والغالي وعدة انواع ومازلت نجرب في الي عجبني وفي الي عادي .

اول كونسيلر جربته كان من ماركة بينفت (benefit) اسمه فايك اب (Fake up) درجتي وسط (medium)
الكونسيلر هذا جدا جدا جدا جميل لإستعمال كل يوم خفيف عالعين وفي نفس الوقت تغطيته ممتازة ،، تقدري تستعمليه حتى في المناسبات ،، ما يخططش ولا يتكتل ويستمر معاك فترة طويلة .
الميزة الي احلى من هكي ان الكونسيلر في الوسط وحواليه مادة مرطبة للعين، غير ان استعماله جدا سهل ، ويعيش معاك مدة طويلة.

الصورة من الانترنت

ثاني كونسيلر خذا ضجة وانشهر بكل ، هو كونسيلر من ماركة نارس (NARS) ، الكونسيلر نوعه مات يعني مطفي ،، حتى هو حلو بكككل ماينشفش العين مع انه نوعه مطفي ،، مايخططش ويطول معاك ،، تغطيته كويسة ،تقدري تستعملي يومي واستعمال للمناسبات. درجتي الي خذيتها اسمها هني (honey) لكن المرة الجاية ان شاء الله حنجرب درجة افتح لان هذي مايلة شوي عالمشماشي. عيبه ان سعره شوي مرتفع ومايقعدش فترة طويلة يعني بسرعة يكمل ،، غير هكي فا هو ممتاز بكل.

ثالث كونسيلر من بينفت برضو اسمه ستاي دونت ستراي (stay don't stray) درجتي فيه ميديام\لايت ، حلو وخفيف عالعين وتقدري تستعمليه برضو كل يوم ، خفيف عالعين تغطيته معقولة وسط يعني ،، ما يخططش ،، وميزته ان تقدري تستعمليه برايمر للجفن قبل ما تحطي الاي شادو ،، مانحسش انه ينفع للمناسبات لانه خفيف ،، ممكن تحطي منه طبقتين :\ ،، بس للامانة الكونسيلر الاول من بينفت (fake up) عجبني اكثر .

رابع كونسيلر من ماركة اربن ديكاي (urban decay) اسمه نايكد (naked) ,, كلمة حلو عليه شوي ،، خفيف عالعين وتغطيته جدا ممتازة ،، تقدري تستعمليه كل يوم وتقدري تستعملي للمناسبات ،، ما يخططش ويستمر معاك فترة طويلة بدون ما يتيغير لونه او يتأكسد . درجتي ميد-لايت نيوترال (med-light neutral)

خامس كونسيلر من ماركة سيفورا (sephora)،، من احلى الكونسيلرات الي جربتهم ،، خفيف خفيف خفيف عالعين ولونه مناسب وحلو ما يخططش ولا يتأكسد،واستعماله سهل لان يجي زي الفرشة ،، بالنسبة ليا نفضله للاستعمال اليومي لكن للمناسبات لا لان تغطيته خفيفة ،، الا لو الشخص الي بيستعمله ما عندش هالات سودة بس بيستعمله عشان الاضاءة .. درجتي فيه رقمها 7 ، عيبه الوحيد ان بسرعة يكمل لو استعمالك له يوميا.

سادس كونسيلر هو من ماركة لورا مارسيي (laura mercier) الصورة حتبين كثرة استخدامي له ،نوعه كريمي ،ثقيييل ما ينفعش لكل يوم نهائيا ،، بس للمناسبات ،، تغطيته ممتازة جدا ،، لا يخطط ولا يتأكسد ،، عيبه غالي شوي بس يعيش معاك فترة طويلة يعني يستاهل. درجتي رقم 2

نجو لكونسيلارت ماركة ماك (MAC) : اول واحد بنتكلم عليه اسمه كوڤر اب (cover-up) ،، تغطيته تعتبر قوية وماينفعش للاستعمال اليومي ،، سائل ،، ولما بتستعملوه حطو منه نقطة بسيطة جدا ،، كويس بس لازم تثبتيه ببودرة ،، بالنسبة ليا جربت احلى منه يعني نقدر نستغى عليه ونبدله بواحد من الكونسيلارات الي حكيت عليهن ،، سعره غالي شوي . درجتي فيه NC30

النوع الثاني اسمه استوديو وهو كونسيلر وكوركتر (studio) ، الكوركتر هو مصحح ينحط قبل الكونسيلر يكون لونه مشمشي ، لو كان عندك حالات واجدة تحطيه قبل وبعدها تحطي الكونسيلر عشان يخفيهن ،، بالنسبة ليا الكوركتر عجبني لكن الكونسيلر لونه حلو بكل صح بس يخطط بطريقة جدا مزعجة ويتأكسد الا لو ثبتيه ببودرة ،، غير ان سعره غالي وحجمه صغير .