ناس نتابع فيهم عالانستقرام

السلام عليكم ورحمة الله وبركاته،،


الانستقرام(Instagram) هو واحد من برامج التواصل الاجتماعي لكن فكرته ان عن طريق الصور والڤيديوات القصيرة
 في عدة حسابات نتابع فيها عالانستقرام في عدة مجالات بنظري انا انها حسابات  مميزة  


ملاحظة : ترتيب الحسابات عشوائيا وليس بالافضلية

اول حساب هو حمزة الاسطى

 شاب ليبي مغترب ،، فكرته ان يعرض ڤيديوات قصيرة  فيها نصيحة ، عبرة ، عضة ، واغلبها نصائح دينية لكن بطريقة شبابية ،، للامانة بالنسبة ليا حتى لو نادر ما نعلق في صفحته بس الشي الي ينزل فيه يخليك تتفائل ، كلامه جدا مريح ،، ماشاء الله ديما مبتسم ،، وفكرته جديدة يعني ماشفتش من قبل شاب او شابة ليبية داروها.
هذا حسابه عالانستقرام : 

alosta5hz

ثاني حساب هو مروة واقا

شابة ليبية هوايتها التصوير  ولكن بطريقة جدا مميزة ،، ماشاء الله في فترة بسيطة قدرت انها تجمع عدد كبير من المتابعين وهذا دليل على تميزها،، عندها اكثر من اسلوب في التصوير وكله متميز ماشاء الله 
هذا حسابها عالانستقرام :

wagaa_m

ثالث حساب هو اسلام الغزالة

شابة ليبية مغتربة في بريطانيا ،، طالبة تصميم ازياء ،، شفت بعض تصاميمها الي عارضتهم على الانستقرام مميزات،، غير ان التخصص هذا مش متدوال عندنا ،، اسلام تحط في حسابها تنسيقات للبسات واشياء ثانية واجدة حتفيدكم ،، الشي الثاني الي يميز اسلام ان عندها مدونة تدون فيها في عدة مواضيع

هذا حسابها عالانستقرام :

eslamesaz

وهذا الرابط لمدونتها:

http://eslamesaz.blogspot.co.uk

رابع حساب cocochanel_ly

شابة ليبية تكتب عن تجاربها مع بعض المستحضرات التجميلية ومستحضرات العناية بالشعر والبشرة ،، غير انها تكتب في تجاربها مع خلطات طبيعية ،،وعدة اشياء تهم البنات 

هذا حسابها عالانستقرام :

libyan_beauty1

خامس حساب ابتهال

شابة ليبية هوايتها التصوير ،، عندها اسلوب تصوير حلو ومميز 

هذا حسابها عالانستقرام :

hebogallery

سادس حساب بلقيس زهير

شابة ليبية عندها  موهبتين الرسم والتصوير،، ماشاء الله تصويرها مميز ومرتب ونفس الشي رسمها جمييييييييل ،، لدرجة احترت

نختار اي صورة 

هذا حسابها عالانستقرام:

blqees_zuhair

سابع حساب THE LIBYAN DIVAs

هي شابة ليبية تعطي في نصائح وخطوات للعناية والاهتمام بالبشرة والشعر لكن الي يميزها ان اغلب النصائح الي تعطي فيها تضمن معلومات طبية مفيدة 

هذا حسابها عالانستقرام :

libyanbeautyby_diva

هذوما بعض من الناس الي نتابع فيهم عالانستقرام ،، نتمنى تطلعو على حساباتهم وتشوفوهم ،، ولو عندكم حد حابين ان انا نتابعه وتشوفو ان حسابه مميز ياريت تكتبولي اسم الحساب بتاعه فالتعليقات ❤